قولي الحمدلله .. عندك نعم كتير أوي ^^ 2019

السلام عليكم ورحمة الله وبركاته
ازيكم يا قمرات
حد لسه فاكرني ولا نسيتوني
عايزة اقولكم على حاجة

زمااااان وأنا صغيرة
مُعلمة القرآن (يارب أرجع أحفظه تانى ) قالتلنا حاجة ضايقتني أوى ..
قالت فيما معناه ” مفيش سعادة مستمرة في الدنيا .. ”
الجملة ديه سببتلي أرق كتير أوي وضايقتني جدًا وحاجات كتير كانت بتحصل حلوة ماكنتش بأفرح عشان مستنية الليفل اللى بعده “النكد”
~~
بس اكتشفت لما كبرت إن عندها حق جدًا
بس في حاجة كمان ..
في نعمة مفتقدينها ودي اللى بتفرق ما بين إنسان حياته كلها بيشتكي وإنسان ظاهر إن مفيش عنده أى مشكلة
– نعمة الرضا –
قال رسولُ الله صلى الله عليه وسلم : ( وَارْضَ بِمَا قَسَمَ اللهُ لَكَ تَكُنْ أَغْنَى النَّاسِ )
ولإن الله “العدل” فأنا مقتنعة جدًا إن كلنا متساوين في كل حاجة و كلنا عندنا مشاكل وكلنا حياتنا مش ماشية زى ما احنا عايزين
بس في ناس راضية باللى ربنا اختاره وناس لأ
قال الله تعالى ( وَلَا تَمُدَّنَّ عَيْنَيْكَ )
بإختصار .. بصوا فى ورقتكم محدش يبص في ورقة اللى جنبه
ولو عايزين تقارنوا بجد ! قارنوا نفسكم بالناس اللي ابتلاءاتهم أصعب منكم
~~

احنا عندنا نعم كتير جداااا
لو جبتِ ورقة وقلم وكتبتي كل النعم اللي عندك من عير ما تطلبيها
ونعمة واحدة او اتنين بس اللي نقصاكِ وأنتِ شايفة إنها فيها سعادتك لكن ربنا اللى اراد انها ماتبقاش عندك عارف أكتر منها إنها ممكن تكون سبب شقاء وتعب ليكِ في الدنيا
وكلي ربك أمرك كله وارضِ بما قسمه الله لكِ واحمدي ربنا على كل النعم اللي عندك وأنتِ ماطلبتيهاش
~~
وللأسف إحنا بننسى كتير إن الدنيا أصلًا دار إختبار يعني طبيعي كل فترة تحصلنا مشكلة كدة نُختبر بيها
ودار فناء مش مخلدين هنا والله ..
ومهما كان شدة الابتلاء
هو مش ربنا قال: (أَلا بِذِكْرِ اللَّهِ تَطْمَئِنُّ الْقُلُوبُ)
المشكلة وحلها في القرب منه بس احنا اللى بنحب نتعب نفسنا ..
~~
وفي نعمةبقى احنا مش متخيلين انها فعلًا حاجة كبيرة جدا
وماطلبنهاش من ربنا لكنه اعطهالنا
نعمة اننا مسلمين
ولو قعدت احمد ربنا طول حياتي على النعمة ديه مش هيكفي برده!
فالحمدلله على نعمة الإسلام وكفى بها نعمة