شعر عن الرجولة , شعر عن الصديق وقت الضيق , قصائد عن مواقف الرجال , اشعار عن الرجل

طبع الصـديق الكفو يعذر صــديقه = ولا شاف زلّة صاحبه يرتفــع فوق
وان عادهـا يبحث عن أسلم طريقة = ويخبره باللي صار بإحساس وبذوق
والثـالثة الله يسمـّـح طريقه = ما احدٍ بمجبورٍ على خــوّة البوق
بعـض العرب صحبته همٍ وضيقة = لا فعلٍ يجمّل .. ولا زين منطــوق
لـو اعتزيت بخوّته نشف ريقه = وابشر بضحكة ناب وبهرج منمـــوق
يحلـف لك انك مثل ( أخــوه وشقيقه ) = وقلبه بنار الزيف والحقد محــروق
أدري المعـــاني .. كلبوها عتيقة = وصـف الصداقة فيه ألفين طــاروق
لكن حقايق .. والمشـــاعر رقيقة = لا اخفيتها ردّت لي الطاق مطبــوق
وزادت علـى قلبي جــروحٍ عميقة = مهما دفنت الجرح يطلع له عــروق
وأعمى البـصيرة ( مايشوف الحقيقة ) = لا صار قلبه عن سنا الحق مصــفوق
تلقاه يسأل عـن عصـاه وبريقه = وهي في يده والقلب جا للبصر عوق
يطرد سرابٍ يـخــدعه في بريقه = ويقعد يغني .. كل مطـــرود ملحوق !!
وبعـــد التروّي .. قـلت بااكتب وثيقة = تضبط علاقاتي مع كــل مخلوق
وما عاد أصاحـب بالطبع والسليقة = أصبح عليّ حقوق وأصبح لي حقوق
باختار لي كــفـــو يمينه طليقة = وقلبه لسرّي ولخفاياي صنــــــدوق
نفسه لهامات الـمعـــالي عشيقة = ولا شاف مني زلّةٍ يرتفع فــــــــوق
صحّ الــــبشر مـن آدم أبو الخليقة = لكن لكل إنسان ميزات وفــــــروق
وصلاة ربي كل وقـت ودقيـقــــة = على النبي .. أعـداد مالاحت بـــروق

بعض المواقف من وراها محاصيل
تكشف لك إسدود الرجال وخبرها

يا تكسب قروم الرجال المشاكيل
والا تجي من دونــها وتخسرها

الكلمه العليا وجزل الأفاعيل
تغنيك عن سبـع البحــور ودررها

وما دامها ما وصلت الحط والشيل
فاصمل وإذا راد الولي تقــتدرهـا

قولة ( كفو ) تتعب عليها الرجاجيل
اللي على روس النوايف نظرها

يا كثر صدقان الصحن والمعاميل
ويا قلهم لامن تقادح شررها

إعلم ترى الخوه فعول وغرابيل
في دورة الأيام يجنا ثمرها

ما كل من ماشيت يجزع به السيل
حذراك تجعل زرقها في نحرها

بعض العرب للتمشيه والتساهيل
وبعض العرب للمعضلات وخطرها

أحدن توصل به بعيد المواصيل
وإذا معه لك حاجتن ما ذخرها

وأحدن هبيل ويحسب انا مهابيل
نستر عيوبه والله اللي سترها

ظهره ظهر عقرب وبطنه بطن فيل
ووقفات سمحين اللحا ما قدرها