الإنهيــــــــــــــــار
الإنهيــــــــــــــــار
بعد فتره من غيابـك.. ليـه بالله اتصلتـي ؟؟
من ثلاث شهور شاللي رجّعك يعنـي وصـار
ما انتي عشتي كل هالفتره ولا حتـى سألتـي
وش حصل هالحين قولي ..علميني باختصـار
ليه دام انك رجعتي اليوم ليه اصـلاً رحلتـي؟
يعني الدعـوه بكيفـك .. او مزاجيـة صغـار
إلا يمكن صار لـك حاجـه بعقلـك وانهبلتـي
وانقلب وضع العلاقه مـن علـوّه.. لإنحـدار
ولاّ ما صدقتي اني اعشقـك .. حتـى ثقلتـي
أو كلام الليل فعـلاً .. معـك يمحيـه النهـار
يوم قررتي .. بليّا سابق انـذار .. اعتزلتـي
جاحدتني.. كن مالي دور فـي صنـع القـرار
وادري انك لا صملتي في قراراتك .. صملتـي
ما تردك دمعتين .. وكسر خاطـر.. واعتـذار
إحتملت اللي لو انك في مكانـي مـا احتملتـي
ووالله لولا اني عرفتك .. ما عرفت الإنهيـار
إنكسار وضيق صدر ومشكلـه لامـن زعلتـي
وإن رضيتي فالمصيبه .. ضيق صدر وإنكسار
ضعت مدري ويش اسوّي فيك لكنـك وصلتـي
مرحله خلتني انسى .. كبريائـي .. والوقـار
صدقيني لو فعلتي في حياتـي .. مـا فعلتـي
ما بيدّي غير احبك .. واعشقك اكثر.. واغـار
يكذب اللي قال عندي مـا طلعتـي ولانزلتـي
واعتبارك في عيوني مـا يجاريـه .. اعتبـار
إنتي اصلاً من وطيتي في مساحاتـي وحللتـي
صرت احس أني مساحه من بياض ومن خضار
مثل الاسطوره واظنك من خلال اسمي دخلتـي
صفحة التاريخ لكن كنتي .. اسطـورة دمـار
مجرمة حب وقتلتيني .. لو انـك مـا قتلتـي
يكفي اني قمت احس برغبتـي فـي الإنتحـار
كلما أذكر كلامك لي علـى الجـوال .. قلتـي:
كل واحد في طريقه .. لي مسار.. ولك مسـار
اذكر اني كنت ساكت وقتهـا .. حتـى قفلتـي
واختنقت .. وما دريت الا وانا أفـك الـزرار
والقط انفاسي وانا اسأل: ليه ياروحي فشلتـي
كانت اول تجربه.. معقول اسـأت الإختيـار؟؟
إفترقنا .. واعتقد من بعد فرقاي .. انشغلتـي
وافتكرتيني .. بعد ما جـار وقتـك واستـدار
إتصلتي .. تسأليني: كيف حالك؟.. وانتشلتـي
جثتي من قبل اموت من القهـر .. والإنتظـار
إيه أنا في خير لكن ودي اعرف .. ويش نلتي؟
من سواتك.. لا ضربتي بعشرتي عرض الجدار
إنفصلتي .. واستقريتي لحالـك .. وانتقلتـي
طالعه وبرغبتك من دار .. واصبحتـي بـدار
بس انا في نار عشت وتهت من يومك رحلتي
حتى في لحظة كتابة هالقصيده .. عشت نـار
عندما غبتي ثـلاث شهـور ماحتـى سألتـي
قلت: اجل آن الآوان.. ويفترض سدل الستـار
وقبل لا اغمض عيوني .. وبثواني .. إتصلتي
لجل تنعاد الحكايه.. و كن مابه شـيء صـار