✿كيف نحسن من سلوكياتنا ✿ 2019

لسلام عليكم يا عدولات..
عاملين ايه؟ اتمنى تكونوا بخير..
كتير مننا بتواجهه مشكلة ومش بيعرف يصلحها، وهي ان سلوكه بيتغير وشخصيته كمان بتتغير وغالبا بتبقى للأسوأ
ودة بيكون لما مرحلة معينة من حياته بتتغير .. زي مثلا النقل من مرحلة دراسية لأخرى، وابرزها من الإبتدائي للأعدادي
وانا نفسي حصلي كدة بس وانا صغيرة .. وبقيت سيئة جدا جدا لكن الحمد لله الموضوع دة مدامش كتير ورجعت زي ما كنت بس بالتدريج وعشان كدة حبيت اني اديكم شوية نصايح عشان المرحلة دي متطولش معاكم
وقبل ما ابدأ هقول جملة ممكن تلخص كلامي .. وهي “البنت المحترمة احسن مليون مرة من البنت الروشة”
——–

نبدأ النصايح بسم الله
*ابعدي عن الصحاب اللي سمعتهم وحشة .. لأن اكيد السمعة دي مش من فراغ وفي حاجة حصلت اتسببت في السمعة السيئة دي لأنهم حتى لو كانوا صحابك المفضلين هيجيبولك السمعة الوحشة -اكتفي بالمعرفة السطحية-
*لما تيجي تخرجي وتيجي لمرحلة انك تختاري هدومك او حتى لما تيجي تشتريها من الأول خالص اشتري حاجة شبه شخصيتك .. واقصد شخصيتك القديمة .. يعني اختاري حاجة تكون بسيطة لأن الحاجات المبهرجة دي مش بيبقى شكلها حلو خاالص بالعكس تتعب عين كل اللي يبصلك .. واختاري الوان هادية ومتبينكيش زي لمض النيون .. واختاري هدوم تكون مريحاكي وفي نفس الوقت شكلها حلو وراضية عن نفسك مية في المية وانتي لابساها ومتكونش ملفتة في نفس الوقت
*ابعدي عن السوشيال ميديا شوية لأنها بتسرق وقتك كتير جدا وبدون فايدة .. اقعدي في اوضتك وابحثي في اعماقك وقربي من ربنا ومن نفسك الحقيقية .. اكتبي كل الحاجات اللي تحسيها بتميز البنت وبتعجبك في ورقة وحاولي تتعودي عليها لحد ما تبقى جزء من شخصيتك بالتدريج
*لما تشتمي مش بتباني انك روشة على قد ما بتباني مش محترمة ومعندكيش حياء عشان كدة ابعدي عن الشتايم وعن الألفاظ الشائعة اليومين دول .. طبعا احنا مع صحابنا بنبقى مهيبرين جدا وبنشتم عادي لأننا واخدين على بعض ودة عادي لكن لو كنا لوحدنا لكن لو قدام الناس ابعدي عن الألفاظ تماما
*صوتك في الشارع لما بيبقى عالي بيغير نظرة الناس ليكي تماما لكن طبعا لو انت مخلوقة صوتك عالي وفي ناس كتير كدة فا دي حاجة من عند ربنا مش هتكلم فيها لكن لو انت صوتك عادي فمتعليهوش قصد .. وطبعا الضحكة في ناس ضحكتها عالية طبيعي و مش بيحسوا بنفسهم وهما بيضحكوا فدي مش هتكلم فيها
*اتعاملي مع الناس بهدوء وحركاتك متكونش اندفاعية فكري في كل حركة بتعمليها
*فكري في كل تصرفاتك قبل ما تعمليها عشان متتحسبش عليكي غلطة
*مش عيب ان يكون ليكي اصدقاء ولاد ولكن العيب هو ان الصداقة دي ميكونش ليها حدود
——-
وعشان تعرفي ترجعي زي ما كنتي تاني دة موضوع صعب مش سهل .. عشان كدة دوري على حاجات كنت بتعمليها في فترة النقاء
زي مثلا الرسم ودي الحاجة اللي كنت بعملها انا لأني بعشق الرسم بجنون وفعلا رجعت لحاجات كتير حلوة كنت بعملها وبقيت اعمل حاجات يدوية وعملت صفحة على الفيس وعلى انستجرم وعندي متابعين كتير ورجعت بسيطة ورقيقة زي ما كنت فعلا
………………………………………………………….
وبس كدة هو دة الموضوع يا عدولات واتمنى تكونوا استفدتوا منه ومكونش نسيت حاجة لو عجبكم الموضوع متنسوش التقييم
في امان الله