كنت تقدر
كنت تقدر
كنت تقدر قبل ماتمشي تقول :
[ إنتهينا ] أو تلمّح للرحيل
كنت تقدر قبل تبدا بالهطول
تهمس بْـ إذني : ترى غيمي بخيل
ماتخلّيني على رفّ : الذهول
بين [ ليه ] وبين [ لا مستحيل ]
المواني تنتظر لحظة وصول
والأماني صبحَها من غير ليل
لو صعود الجرح .. قابل للنزول
سال في قلب المعنّى : سلسبيل
شف زلازل غيبتِك يابن الأصول
هدّت بْـ صرح المشاعر ألف حيل
في زوايا غرفتي ألمَح : نحول
حتى شبّاك الفَرَح بعدك : هزيـل
قبل تمشي قول عذرك لو يطول
ياخي إكذب .. بال صاحبك طويل
كلّ كذبة مِنْك تستدعي القبول
لو تقول إنّ المربّع : مستطيل
ياعديم الحِس .. إسمح لي أجول
في براح الجرح لو من غير خيل
خلّني بين المحاجر والفصول
فصل خامس .. دمعته عيّت تسيل
