كلمات عن النسيان , كلام عن النسيان
أنساها
الكل بيقولي إنساها
أنساها
طب ازاي انساها
وانا كل نقطه فى دمي فاكراها
وكل نبضه فى قلبي نابضاها
وكل كلمة حب ناطقاها
ولما بصرخ م الألم
بتكون فى صرختى الآهه
أنساها
أنساها
ازاى وانا كل حروفي كاتباها
ياناس
ياناس الحب
عمره ما كان ذكرى
دا هي الامل بكره
ومن عيني دمعه بتحير
فى هواها عمري ما اتغير
وان سكت يوم قلبي
عقلي عاشقها بالفكره
دا هي البسمه
لما سفينة همي
توصل شط مرساها
أنساها
أنساها
طب ازاى من غير هواها اعيش
دا هي قوت قلبي
وغيرها مليش
دانا لو صاحب كيف
هي لدماغي حشيش
ولو كيفي حلاوه
هتبقى سكره السنترافيش
ولو فى حبى انا بلطجي
هتبقى هي لسوابقى الفيش
اصل الكيف مهوش بالكيف
وانا مش بكيفى
ان كيفى فى هواها
أنساها
أنساها
دا المجنون عمره ما نسي اسمه
والفنان عمره ما نسي رسمه
وانا اتولدت وعلى قلبي الهوى مكتوب
ومحسوم امرى فى الهوى
وياريت انا حاسمه
وإسألوا عنى مليون عاشق
إسألوا الهايم
وإسألوا اللى فى هواه غارق
هيقولوا فى بحر الهوى انا القبطان
عاشق قمر
عمر النجوم ما جمبه تبان
وازاي نور شمعه هيطفى نور الشمس
واقول لكم اكيد يحصل
لما تلاقونى فى الهوى ولهان
وبرسم على جدار السما بألوان
والاقى عقلى ودانى
اسكن جوا وجدانى
واقابل روحى بجروحى
ولما اجى اكلمها
الاقى كلامي غناها
