طريقة استعمال غسالة ال جي 7 كيلو ، كيفية استخدام غسالة lg 7kg

بدأ بسم الله

هنبدأ بكيفية التشغيل

1/بنحط الفيشة ونضغط على زرار الباور

2/ بنختار البرنامج ونظبط الخيارات ودرجة الحرارة والعصر

3/ بنحط المسحوق

4 / نضغط زرار التشغيل

دية الطريقة المختصرة
الشرح

ده شكل عام أول لما بنحط الفيشة ونضغط على الباور
شرح البرامج

**قطن** وده انا بستخدمة مع الابيض الشديد الوسخ يعنى مثلا مع الهدوم الداخلية وممكن اى فواتح قطن
ومدتة تقريبا 3 ساعات وربع (حمولته 7 كيلو )

**قطن سريع ** البرنامج ده حلو اوى مع الفواتح خاصة فى الصيف لان الهدوم مش بتكون متسخة أوى وده مدته تقريبا ساعة وربع (حمولتة 7 كيلو )

**اصطناعى ** وده للاقمشة الصناعية يعنى ال عليها فتله بلوستير مثلا وبصراحة انا مش بستخدمة خالص لانه طويل وكمان حمولتة (3.5)

**أغطية السرير ** وده مثلا للكوفرتات او لحاف فيبر خفيف وده حمولته احجم احادى يعنى قطعه واحده علشان طبعا بتكون تقيله

**ضخم** البرنامج ده لذيذ وهو للهدوم التقيله ال بتمتص مية كتيرة وانا كمان بستخدمة لأى غوامق
ومدتة ساعة وخمس دقايق حمولته (7 كيلو )

**30 دقيقة ** برنامج سريع يعنى للحاجات ال انتى مستعجله عليها ومش متسخة يعنى ينفع مثلا لهدوم الخروج ال بتستحمل أو هدوم البيت النظيفة (عرق يعنى ) ودة حمولته (2 كيلو )

** شطف وعصر ** طبعا واضح للشطف والعصر بس من غير غسيل

**عصر** لما تغسلى حاجة بره الغساله وعاوزة تعصريها فى الغساله

** برنامج للملابس الحساسة ** يعنى الحراير أو الهدوم المطرزة وده مدته ساعة تقريباوحمولته (2 كيلو )

**برنامج الصوف والغسيل اليدوى ** وده بالظبط كأنك بتغسلى على ايدك يعنى متخافيش خالص على الغسيل
وينفع للتشيرتات او الصوف وبيلف الغسيل براحة اوى ومدتة تقريبا 35 دقيقة (حمولته 2 كيلو )

**العناية بالبقع ** دة بقى حبيبى اوى بغسل فية الهدوم المبقعة الفواتح طبعا والبرنامج ده بيعتمد على انه بيشطف بمية سخنة فتحسى انه بينور الغسيل ومدتة تقريبا ساعتين وربع (حمولتة 7 كيلو )

** العناية بالغلى ** برنامج الغلية وطبعا كلنا عارفينه (غلى الملابس ) وحمولته (7 كيلو )

**عناية الأطفال ** هدوم البيبهات وهو برنامج حنين وبيشطف بمية سخنة علشان التعقيم وبياخد شطفه أولية
حمولته (6 كيلو )
وديه صورة البكرة بعد اختيار البرنامج

** الشطف الطبى ** وده بيشطف بمية سخنة علشان التعقيم وكمان بيساعد على النظافة

** الغسيل الأولى ** وده زى الفوم الاول كده يعنى بيسحب مية ومسحوق بسيط ويغسل ربع ساعة ويعصر وبعدها يبدأ الغسيل وده بيفيد فى الغسيل المترب بس انا بستخدمة من غير مسحوق بمية بس

** الكثيف ** الخيار ده بيزود مدة الغسيل بتاعة البرنامج يعنى مثلا لو البرنامج ساعة لكن مده الغسيل فية 20
دقيقة بس فبيضاعف مدة الغسيل ملوش علاقة بالشطف والعصر ودة طبعا للغسيل المتسخ أوى

** مانع التجاعيد ** علشان الهدوم متكرمش وانا بستخدمة مع هدوم الخروج بس او الستاير

ثالث حاجة
درج المسحوق

الدرج متقسم 3 خانات الخانة اليمين بتحطى فيها مسحوق مع اختيار الغسله الاولى فقط (انا مش بستخدمة اصلا )

الخانة الوسط للمنعم أو الزهرة بس متزوديش عن العلامة الزرقاالخانة الشمال للمسحوق الاساسى

شرح درجات الحرارة ودرجات العصر

طبعا كل برنامج متبرمج عليهم لوحده بس نقدر نغير

الصورة واضحة اوى

الحاجة ال عاوزة اوضحها
وهى ايقاف الشطف ودية بقى لما تغسلى ومش هتنشرى علطول فتستخدميها فبعد ما الغسيل يتشطف
الغساله هتحتفظ بمية اخر شطفه لحد لما تعملى عصر
ودية بتفيد فى عدم الكرمشة لو هنتأخر على النشير أو انك تنقعى الهدوم فى المنعم شويه

زرار تأجيل الوقت

وده كويس أوى لما نكون عاوزين نغسل فى ميعاد محدد
نظبط الغساله على كل حاجة
وقبل ما نضغط استارت نضغط علية بعدد الساعات ال عاوزينها
وبعدين نعمل استارت
وهى هتشتغل فى الوقت المحدد

الفلتر

كل شهر بنعمل دورة خل لغساله
ونفك الفلتر ده ونظفة من اى وبر او بواقى

وتنظيف الفلتر بيساعد على نظافة الغسيل

كده انا خلصت

يارب اكون عرفت افيدكم