خواطر باسم سهيل 2019, كلام جميل باسم سهيل , أشعار باسم سهيل

مابين حزني والورق والمعاني= اكتب قصيدي بين ظلمن وحره
الدرب وينه ياسهيل اليماني=دارت بنا الدنيا على حين غره
قفى طريقه عن طريقي زماني=والقلب حرق من لواهيب جمره
لوهي على كيفي ظروفي ثواني=لترك اثر في عالم الكون جره
لجعل قصيدي فالكواكب مباني=حتى تكون حروف مثل المجره
اثره غريبن هالزمن لو عطاني=لابد ما يكشف مع الوقت امره
من عقب ماهو صايرن لي حصاني=هجر زمان العشره وخان سره
ان كان قصده في سهومه رماني=والله ماحرك من سواياه شعره
صحيح اعاني من قسى الوقت اعاني=والروح تشكي من لواهيب جمره
لاكن الي قلبن عن الذل اناني=حتى ولو طال الصبر ماتشره
يجزع ولا عاش بحياته هواني=يفر بجناحن كما الطير فره
انا احمد الله يوم ربي عطاني=قلبن صبورن فالمعالي مقره
حتى ولو انه خويي نساني=وضاقت علي الكون مثقال ذره
اصبر كما يصبرعلى السجن جاني=مترقبن يومن يفكون اسره
الدرب وينه ياسهيل اليماني=دارت بنا الدنيا على حين غره
ياما بنينا آمال فيها اماني=وياما حلمنا احلام فوق المسره
راحت سنين العمر كله ثواني=وذبلت زهور الورد من فوق قبره
ومات الغلا والحب ياحلى اماني=وفارقت قربك بين زينه ومره
مابين حزني والورق والمعاني=اكتب قصيدي بين ظلمن وحره
وكل الامل بالله معطي الجناني=انه ييفك الهم ويفك ضره
ويادمع وقف لاتعذب كياني=ترى الفرج للعبد في قو صبره