محمد الطيب الأمين: إنت كحرامي لازم تحدد موقع الجيب
* في الخرطوم عشان تصل محل ماشي لازم تركب (مواصلتين) تلاتة ..
* والمواصلات في الأصل هي تحتاج لدعوات من والديك ..
* لو ما (أموك وأبوك) راضين عليك الله أعلم تركب مواصلات في الخرطوم ..
* المواصلات في البلد دي تحتاج لتوفيق رباني وحظ عظيم ولياقة بدنية عالية جداً ..
* لو ماشي الشغل تركب (مواصلتين) ولو جاي من الشغل تركب (مواصلتين)، ومرات في الغالب بتركب بالقطاعي وربما تصل البيت بعد خمس مواصلات ..
* أسوأ من هذا .. السرقة التي تتم على هامش (الأزمة والزحمة) ..
* قبل يومين (صديقنا) صرف المرتب ومعاهو حافز شهري ..
* وضع المرتب في الجيب الخلفي، ووضع الحافز في جيب القميص الذي هو (جنوب شرق البطن وشمال غرب الصدر)..
* إنت كحرامي لازم أول حاجة تحدد موقع (الجيوب) بشكل دقيق ..
* لازم تعرف إنو جيب القميص بيقع (شمال غرب الصدر وجنوب شرق البطن) ..
* صديقنا وهو راجع على البيت ركب (مواصلتين) ..
* في المواصلات الأولى سرقوا منو (المرتب) من الجيب الخلفي ..
* وفي المواصلات التانية سرقوا منو (الحافز) من جيب القميص ..
* يعني (إتنشل) مرتين ..
* وحكمة الله (النشال) بتاع المرتب ليس هو نشال بتاع الحافز ..
* ولأن (صديقنا) هو (صديقنا) فقد (طقطقنا) له (شيرنق) لتعويض المرتب، أما (الحافز) فهذا من نصيب الحرامي ابن الحرامي ..
* وبما إن ذلك كذلك فإن المريخ سيتنشل في يوغندا (مرتب)، وسيتنشل في الجزائر (حافز) ..
* وعلى أصدقاء المريخ أن يجهزوا له (شيرنق) عبارة عن سيكافا ..
* وغايتو جنس غايتو ..
* هدف في أول ربع ساعة سيحول مباراة الهلال والجيش الزنزباري إلى (تمرين) ..
* العقلية التي يجب أن يلعب بها الهلال مباراة الجيش هي (عقلية الفوز) ..
* الأندية الكبيرة مثل الهلال تفوز (رايح جاي) في هذه الأدوار التمهيدية ..
* لا (تعادل) ولا أقل خسارة، الهلال يلعب من أجل الفوز خارج الديار وهكذا (تتثقف) الفرق التي تنوي وتنشد البطولات ..
* ولقدام يارب ..
* (تحت تحت) قالوا المريخ الشهير بـ(المدفور) جهز شكوى من (14) ورقة فلوسكاب ضد حارس الهلال (اليوغندي) جمال سالم بسبب زيارته لفريق فايبر (اليوغندي) قبل ساعات من مباراته الأولى أمام المريخ بأم درمان ..
* في الشكوى قالوا (الزيارة) هي سبب النتيجة الضعيفة التي خرج بها المريخ ..
* قالوا ود سالم كشف المريخ لليوغندي ..
* سبحان الله ..
* المريخ المكشوف ما داير كاشف ..
* ومع ذلك نلوم جمال سالم الذي (زار) أبناء وطنه في وقت ما وقت زيارة ..
* أقترح لناس المريخ يكتبوا في الشكوى إنو جمال سالم زار البعثة اليوغندية في وقت (القيلولة) ..
* هكذا أقترح ..
* وأى زول طبعاً حر في (مقترحاتو) ..
* وتبكو بس .. عين قطرة وعين مس ..
* الزعفوري هو ليس أفضل من بلاتشي ولا أفضل من العشري ولا النابي ولا كافالي ..
* الأكيد المؤكد أن الزعفوري (أرخص) من لافاني وفارياس وباتريك ..
* والذي لا شك فيه أن حال الزعفوري لن يكون أفضل من حال سابقيه فهم السابقون وهو من اللاحقين ..
* ولذلك يجب أن يبحث الهلال عن مدرب (سوبر إستار) على أن يعود الزعفوري مساعداً له ..
* في حواره مع صحيفة (قوون) أمس، قال مدافع المريخ حمزة داوود : (أمير كمال رفض شارة القيادة لأن الناس تحمله سوء النتائج) ..
* في المريخ (شارة الكابتنية) ما في زول دايرها، وفي الهلال (شارة الكابتنية) بتشاكلوا من أجلها ..
* عشان كدا يبقى الهلال هلال ويبقى المريخ مدفور ..
* فرق كبير ..
* حمزة داوود قال إن المدرب الزلفاني (طرده) من التمرين ..
* طيب السبب شنو ؟
* قال : اتصل علي أيمن عدار وقال لي المدرب طردك عشان ما سلمت عليهو ..
* وقبل كده غارزيتو طرد بلة جابر عشان بلة ما سلم عليهو ..
* واضح إنو في المريخ في مشكلة (سلام) ..
* والله صحي ..
* ده اللاعب التاني يتم طرده عشان ما بسلم ..
* وأنا بصراحة ما عارف لشنو الناس دي ما بتسلم ؟
* لشنو يا حمزة ما سلمت على الزلفاني؟
* طيب كان تسلم بعيونك لو عز الكلام ..
* الزلفاني راجل بسيط لو سلمت عليهو بتدخل التشكيلة ..
* دخول تشكيلة المريخ حسب (سلامك) ..
* لو سلمت بالأحضان بتدخل التشكيلة ..
* ولو سلمت باليد بتدخل قائمة الـ(18) وبالتالي ستجلس في كنبة الاحتياطي ..
* ولو سلمت بطرف يدك معناها إنت بره التشكيلة وبره القائمة ..
* تحضر المباراة من المقصورة يا مولانا ..
* أما لو ما سلمت فسيتم طردك ..
* يعني يا حمزة يا أخوي دخولك للتشكيلة بحددو (سلامك) ..
* وإنت .. ده ما سلامك ولا الكلام الكان زمان كلامك ..
* ياخ سلم ..
* سلم بعيونك إن شاء الله عشان ما يطردك قدام أخوانك اللاعبين ..
* والسلام سنة الإسلام.
* وغايتو الله يكفينا شر (المُصدي) اللمعتو الأيام ..
* ونركب صافنات ونجيبة (تونسية) وأصلو الزول بيموت والذكرى تفضل حية ..
* و..و..
* وبشكي ليكم يا مظاليم الهوى أصلي ….(منشُول مرتين).
